Марина Костова е наградувана новинарка и филмска критичарка. Заменичка-главен уредник е на Дигиталната редакција САКАМДАКАЖАМ.МК (www.sdk.mk).

Добитничка е на највисоката државна награда за новинарство и публицистика „Мито Хаџивасилев-Јасмин“.

Беше помошничка-главен уредник на дневниот весник „Вест“.

Потпретседателка е на Меѓународната федерација на филмски критичари (ФИПРЕСЦИ) и претседателка на Македонската секција. Учествува во жирија, меѓу кои и на фестивалите во Венеција, Оберхаузен, Сараево, Истанбул, Солун, Виена. Објавува и рецензии на официјалната веб-страница на ФИПРЕСЦИ (www.fipresci.org).

Авторка е на монографиите „Манчевски“, „Дожд, светот за ‘Пред дождот’ на Милчо Манчевски“ и на збирката „Јазикот е чудна ѕверка“. „Манчевски“ е наградена за најдобро оригинално издание на Саемот на книгата Скопје 2015. Како македонски артефакти обете монографии се достапни во над 120 национални и универзитетски библиотеки во светот. 

Авторски е вклучена и во антологиите на македонскиот краток расказ „Џунџуле во земјата на афионите“ и „Скопски раскази“, и во „Скопски алманах – Неработен ден“.

Дел е од авторскиот тим на првиот македонски Речник на медиумската писменост (https://recnik.medium.edu.mk/ ). 

Била коселекторка на Фестивалот на филмска камера „Браќа Манаки“ и советничка на Солунскиот фестивал. Работела истражувања за филмовите „Прашина“ и „Мајки“ на Милчо Манчевски, „Големата вода“ на Иво Трајков и „Боли ли“ на Анета Лешниковска.

Коавторка е на ЦД-ромот „Македонија во архивите на Њујорк тајмс“.